نرمين العرابى
الضمير والنية هما اساس الانسان وهما اللى بيوضحوا معدن كل انسان .
دايما بنقول دعوه لبعض بس يمكن البعض فينا مش مركز فى معناها دعوة
(ربنا يعطيك على اد ضميرك)
الدعوة دى ممكن تكون جميله جدا لبعض الناس
وكمان ممكن تكون مؤذية كتير لبعض الناس .
لأن الدعوة راجعه للضمير يعنى النيه اللى داخل الانسان .
ومهما يظهر من حب ومخادعه وحنين مزيف ووجه طيب
ربنا شايف اللى جواه وداخل ضميرة ونيته .
هقول مثال : ممكن مثلا يمثل على واحدة دور الراجل المحب المخلص المحترم وان نيته مخلصه ليها وانه عايز يقرب منها ويتزوجها بس لانه بيحبها ونفسه يكمل عمره معاها لكن داخل نيته هدف الاستقطاع والاستغلال ويكون ليه اهداف لعينه وبعد فترة ربنا بيظهر كل دا لان لو احنا غافلين الله لا يغفل .
مثال تانى : ممكن واحدة بردو تلعب على رجل دور الاحترام والحنيه وكل هما وجدها بجواره ، وبعد فترة ربنا يكشف نيتها واهدافها ويظهر وجهها الحقيقى .
أعنى , لو الضمير يصحى هنعامل بعض بشفافيه .
لو الضمير يصحى هنبعد عن الانانيه.
لو الضمير يصحى هنعامل بعض بحب بجد مش بغش هتكون النيه صافيه لرب العالمين .
احنا بنعانى من قلة الخير والبركه فى حياتنا . ومستغربين ليه!!!!
المفروض منستغربش لان النيه الصافيه والضمير النضيف هما اساس البركه والخير وراحة البال .
مثال تالت : لو شفنا مثلا الموظف وهو يبذل الواجب نحو الراجل او الست الغلبانه وهى واقفه على رجلها بتخلص اوراق مهمه لو حطينا نفسنا مكان بعض وصحينا ضميرنا هنلاقى ان اد ايه محتاجين نفوق بجد محتاجين نفوق ونقول لنفسنا لو بدلنا الكراسى وانا اللى مذلول ياترى هشوف شكلى ازاى ادام نفسى . والنصاب اللى بينصب ويستغل عفوية الناس ، لو انت اللى اتنصب عليك هتحس بايه .
لو الموظف اللى قاعد على مكتبه ومستنى ياخد فلوس من حد غلبان وقليل الحيله ومحتاج يخلص ورقه او يكمل حاجه فى اوراقه مهمه ممكن تفرق معاه فى حياته ،لو شفت نفسك انت اللى مكانه واشد الاحتياج للورق دا اكيد مكنتش هتتحمل الذل والاستغلال عشان انت محتاج .
وفى امثله كتير وكتير . لكن الفكرة كلها ان ازاى نصحى ضميرنا ازاى نتقى الله فى بعض ،ازاى نحسن النيه جوانا لبعض (حب للناس ما تحبه لنفسك).
كل واحد فينا محتاج من جواه يعمل صحوة ضمير ويصلح من نفسه قبل ما يفوت الاوان ويرجع يندم ويقول يا خسارة يارتنى كنت اخلصت ،يارتنى كنت اتقيت الله فيما افعل ،يارتنى ما غلط ولا غشيت ولا كدبت ولا سرقت ولا ولا ولا ….
لازم نحس بالندم عشان نصلح من نفسنا وترجع تانى الدنيا بخير لازم نبطل نحقد على بعض ،ونحب بعض بجد مش عشان المصالح ، نحن فى زمن زاد فيه المصلحه وقل فيه الحب والخير والضمير .
تعالو نعمل دعوة كلنا مع بعض ونسميها (يلا نصحى ضميرنا ) يلا نحب بعض بجد ونكون سند لبعض ، يلا نرجع ايام الخير تانى والرزق الحلال .
يلا نكسب رضى ربنا علينا بنيتنا الصافيه .
انشرو المحبه والخير ونعمل صحوة لضمير الغائب الضمير لو يصحى ويعود لعاد معه كل الخير والنور والمحبه . الضمير لو يصحى
